سياسة الخصوصية

ارتكاز (irtikaz.app) · آخر تحديث: 18 أكتوبر 2026

بنحتفظ بإيه

• حسابك: الإيميل. كلمة السر بتتحفظ مشفّرة عند خدمة تسجيل الدخول (Supabase)، وإحنا ما بنشوفهاش.
• اللي جوه الكشوف: سطور الحركات (التاريخ، الوصف، المبلغ، الرصيد، رقم المرجع) والأسهم اللي معاك في آخر كل شهر (الكود، الكمية، السعر).
• بصمة الحساب: رقم مشتق من كود العميل في شركة الوساطة بطريقة ما تترجعش (SHA-256 مع قيمة سرية)، عشان نعرف كل كشف تبع أنهي حساب لو عندك أكتر من حساب. الكود نفسه مش بنحفظه.
• اللي بتكتبه بنفسك: الأسعار والمستهدفات والإعدادات، وبيانات «مصاريفي» (الدخل والمصاريف) لو استخدمتها، وقايمة الأسهم اللي بتتابعها.
• لو فعّلت «كشوف ثاندر بالإيميل»: عنوانك الخاص، وسجل قصير باللي وصل (نوعه وحالته وفترته). الإيميل نفسه ومرفقاته ما بيتحفظوش.
• لو ربطت تليجرام: رقم المحادثة عشان نبعتلك التنبيهات.

مش بنحتفظ أبدًا بـ

• ملف الـ PDF نفسه: بيتقري في الذاكرة ويتمسح على طول.
• اسمك زي ما هو مكتوب في الكشف، وكود العميل، والرقم القومي، وأرقام الحسابات البنكية.
• كلمة السر بتاعتك في ثاندر: إحنا مش بندخل على حسابك في ثاندر خالص، بنقرا بس الكشوف اللي إنت بتنزّلها.

مين تاني بيشوف حاجة

• Supabase: قاعدة البيانات وتسجيل الدخول، على سيرفرات في فرانكفورت (ألمانيا).
• Render: السيرفر اللي بيشغّل التطبيق ويحسب الأرقام.
• Cloudflare: الدومين، والإيميلات اللي بتوصل لعنوانك الخاص لو فعّلت الكشوف بالإيميل (بيعدّي عليه الإيميل في الطريق، زي Gmail).
• تليجرام: لو ربطته بس. بيوصله كود السهم والنسبة والسعر والنموذج، من غير أي مبالغ أو كميات أو قيمة محفظتك.
• Google Fonts: الخطوط بتتحمّل من جوجل، فجوجل بيشوف عنوان الـ IP بتاعك زي أي موقع بيستخدمها.
• مصدر أسعار البورصة: بيوصله قايمة أكواد الأسهم بس، من غير أي حاجة عنك.

غير كده مش بنشارك بياناتك مع حد، ومفيش أدوات تتبّع أو إعلانات في التطبيق.

«شارك»

كارت «شارك» بيترسم على موبايلك ويوصل بس للي إنت تبعتهوله. فيه كود السهم والنسبة وعنوان التطبيق، من غير مبالغ أو كميات.

لحد إمتى ومسح الحساب

بياناتك بتفضل محفوظة طول ما حسابك موجود. تقدر تمسح الحساب وكل بياناته في أي وقت من التطبيق أو الموقع: ادخل حسابي ← امسح حسابي وكل بياناتي ← اكتب «امسح». المسح بيحصل فورًا ومفيش رجوع فيه. النسخ الاحتياطية اليومية لقاعدة البيانات بتتمسح لوحدها في خلال 7 أيام.

لو مش قادر تدخل حسابك، ابعتلنا من نفس الإيميل المسجّل وهنمسحه.

الحماية

• الاتصال كله مشفّر (HTTPS).
• كل مستخدم يقدر يوصل لبياناته هو بس، والقاعدة نفسها بتمنع غير كده.
• المفاتيح السرية على السيرفر بس، عمرها ما بتوصل للموبايل أو المتصفح.

مش نصيحة استثمارية

ارتكاز أداة لتنظيم وتحليل حركات حسابك من الكشوف اللي بترفعها. الأرقام محسوبة آليًا وممكن يكون فيها أخطاء، فراجعها مع كشوفك الأصلية. مفيش أي محتوى هنا يعتبر نصيحة أو توصية بالشراء أو البيع. ارتكاز مش تابع لثاندر ولا لأي شركة وساطة.

للبالغين

التطبيق معمول للي عندهم حساب في البورصة، يعني 18 سنة أو أكتر.

التواصل

أي سؤال أو طلب بخصوص بياناتك: hello@irtikaz.app

لو غيّرنا السياسة دي هنكتب التاريخ الجديد فوق، ولو التغيير مهم هنقولك جوه التطبيق.

ارجع لارتكاز